"Қазгидромет" РМК Қазақстанның 8 өңірінде ауа райына байланысты ескерту жариялады. Синоптиктердің болжамына қарағанда, дауыл тұру ықтималы 80-100% айналасында, деп хабарлайды ҚазАқпарат.
Ақмола облысында 7-8 маусым күндері түнде жел алдымен оңтүстік-батыстан, артынша солтүстік-батыстан секундына 15-20 метр жылдамдықпен еседі, күндіз өңірдің басым бөлігінде 15-20 м/с, ал екпіні 25 м/с-қа дейін жетеді. Кей жерлерде күн күркіреп, күндіз дауыл, шаңды дауыл соғуы мүмкін, бұршақ жаууы ықтимал.
Астанада 8 маусым күні күндіз жел оңтүстік-батыстан, солтүстік-батыстан соғады, екпіні 15-20 м/с, кейде 23 м/с-қа дейін жетеді. Таңертең және күндіз найзағай ойнап, дауыл соғады, шаңды дауыл тұруы, бұршақ жаууы мүмкін.
8 маусым күні Қостанай облысының кей жерлерінде күн күркіреуі мүмкін, жел батыстан, солтүстік-батыстан секундына 15-20 метр жылдамдықпен соғады.
Оңтүстік-Қазақстан облысында 8 маусым күні таңертең және күндіз дауыл тұрып, найзағай жарқылдайды. Тәулік бойы кей жерлерде оңтүстік-батыстан, солтүстік-батыстан секундына 15-20 метр жылдамдықпен соққан желдің екпіні 25 м/с-қа дейін жетіп, шаңды дауылға айналуы мүмкін.
Шымкентте 8 маусым күні күндіз найзағай жарқылдап, оңтүстік-батыстан, артынша солтүстік-батыстан соғатын желдің жылдамдығы 15-20 м/с-қа дейін жетуі мүмкін.
Болжам бойынша, 9 маусым күні Алматы және Жамбыл облыстарындағы, сондай-ақ Алматыдағы өзендерде, ал 10 маусымда Алматы облысының таулы аудандарында жауын-шашын болып, кей жерлерде күшейетіндіктен, су деңгейі көтеріліп, кей жерлерде арнасынан тасуы мүмкін.
