10 маусымда еліміздің көптеген өңірінде құбылмалы ауа райы сақталады, деп хабарлайды inbusiness.kz сайты.
Синоптиктердің болжамынша, солтүстік, орталық және батыс аймақтарда жаңбыр жауып, найзағай ойнайды, кей жерлерде бұршақ пен дауыл болуы мүмкін.
Астана қаласында күндіз жаңбыр, найзағай және бұршақ күтіледі. Алматы мен Шымкентте де өткінші жаңбыр жауып, найзағай ойнауы ықтимал. Желдің екпіні кей өңірлерде секундына 15-20 метрге дейін жетеді.
Қостанай, Солтүстік Қазақстан және Ақмола облыстарында қатты жаңбыр, бұршақ және дауыл болжанып отыр. Павлодар, Ұлытау, Қарағанды, Ақтөбе, Батыс Қазақстан және Атырау облыстарында да жаңбырлы ауа райы сақталады.
Шығыс Қазақстан, Абай, Павлодар, Алматы және Жетісу облыстарында күндіз ауа температурасы 35-38 градусқа дейін көтеріліп, қатты ыстық болады.
Сонымен қатар Абай, Шығыс Қазақстан, Алматы, Жетісу, Қызылорда, Түркістан, Ақтөбе, Қарағанды және басқа да бірқатар өңірде жоғары және төтенше өрт қаупі сақталады.
Маңғыстау облысында түнгі және таңғы уақытта тұман түсуі мүмкін. Ал Түркістан мен Қызылорда облыстарының кей аумақтарында шаңды дауыл күтіледі.
Мамандар тұрғындарды ауа райының қолайсыз құбылыстарына байланысты сақтық шараларын сақтауға шақырады.
