30 қазанда еліміздің бірқатар облысында қолайсыз ауа райы күтіледі, деп хабарлайды inbusiness.kz сайты.
Кей өңірлерде жаңбыр мен қар жауып, көктайғақ болады. Сондай-ақ тұман түсіп, жел күшейеді.
Шығыс Қазақстан облысында жаңбыр мен қар жауып, солтүстік және таулы аудандарда жауын-шашын кей уақытта қатты болады. Көктайғақ күтіледі. Желдің екпіні 15-20 м/с-қа жетеді.
Абай облысында да жауын-шашын түсіп, солтүстік және шығыс аудандарда көктайғақ болады. Павлодар және Солтүстік Қазақстан облыстарында жаңбыр мен қар жауып, желдің жылдамдығы 15-20 м/с-қа дейін күшейеді.
Алматы, Жетісу және Жамбыл облыстарының кей жерлерінде түнде 1-9 градусқа дейін үсік жүреді. Таулы аудандарда тұман түсіп, жел күшейеді. Ал, Қызылорда облысының солтүстігінде, орталығында 3 градус, Түркістанда түнде 1-3 градус үсік күтіледі.
Маңғыстау облысында күндіз желдің екпіні 15-20 м/с-қа жетеді. Ақтау қаласында да жел күшейеді.
Сонымен қатар бірқатар өңірде өрт қаупі сақталады. Ақтөбе, Атырау және Қызылорда облыстарында, сондай-ақ Жезқазған қаласында төтенше өрт қаупі бар. Алматы мен Шымкент қалаларында жоғары өрт қаупі сақталады.
