Президент Кеңсесінің бұрынғы басшысы Нұрлан Оңжанов Қазақстанның Германиядағы Төтенше және Өкілетті Елшісі болып тағайындалды, деп хабарлайды inbusiness.kz Ақорданың сайтына сілтеме жасап.
"Мемлекет басшысының Жарлығымен Нұрлан Баймолдаұлы Онжанов Қазақстан Республикасының Германия Федеративтік Республикасындағы Төтенше және Өкілетті Елшісі болып тағайындалды, ол Қазақстан Республикасы Президенті Кеңсесінің бастығы лауазымынан босатылды", – деп жазылған жарлықта.
Нұрлан Оңжанов 1960 жылы туған.
1983 жылы Гумбольдт атындағы Берлин университетін бітірген.
1983-1986 жылдары – Алматы педагогикалық шетел тілдері институтында оқытушы.
1986-1992 жылдары – Морис Торез атындағы Мәскеу мемлекеттік педагогикалық шетел тілдері институтында аспирант, зерттеуші-стажер.
1992-1994 жылдары – жетекші маман, бас маман, бөлім бастығы, Қазақстан Республикасы баспасөз және бұқаралық ақпарат министрінің кеңесшісі.
1994-1996 жылдары – Қазақстан Республикасының Президенті Аппараты Халықаралық бөлімінің аға референті.
1996-1997 жылдары – Қазақстан Республикасының Австрия Республикасындағы Елшілігінде бірінші хатшы, кеңесші.
1997-2001 жылдары – Қазақстан Республикасының Швейцария Конфедерациясындағы Елшілігінде кеңесші.
2001-2002 жылдары – Қазақстан Республикасы Сыртқы істер министрлігінің экономикалық саясат департаментінің директоры.
2002-2003 жылдары – Қазақстан Республикасының Германия Федеративтік Республикасының Майндағы Франкфурт қаласында бас консул.
2003-2004 жылдары – Қазақстан Республикасы Сыртқы істер вице-министрі – Тәуелсіз Мемлекеттер Достастығы істері жөніндегі комитетінің төрағасы, "Орталық Азия ынтымақтастығы" ұйымының қызметі мәселелері бойынша Қазақстан Республикасы тарапынан ұлттық үйлестіруші.
2004-2007 жылдары – Қазақстан Республикасы Сыртқы істер министрінің орынбасары.
2007-2008 жылдары – Қазақстан Республикасы Президентінің көмекшісі.
2008-2014 жылдары – Қазақстан Республикасының Германия Федеративтік Республикасындағы Төтенше және Өкілетті Елшісі, сондай-ақ Дания Корольдігіндегі Елшісі қызметін қоса атқарушы.
2014-2019 жылдары – Қазақстан Республикасы Президентінің көмекшісі.
2019 жылғы 21 наурызда Мемлекет басшысының Жарлығымен Қазақстан Республикасы Президенті Кеңсесінің бастығы болып тағайындалды.
"Құрмет" (2006), "Парасат" (2011) ордендерімен және 5 медальмен марапатталған.
Төтенше және Өкілетті Елші дәрежесіне ие.
Филология ғылымдарының кандидаты. Неміс, швед, ағылшын тілдерін меңгерген.
