Ресейдің Әскери-техникалық ынтымақтастық федералдық қызметінің директоры Дмитрий Шугаев РБК-ға сұхбатында Қазақстан Ресейден биыл қару-жарақ пен әскери техника сатып алғаны туралы айтқан болатын. Қазақстанның Қорғаныс министрлігі Шугаевтың "қатесін" түзетіп, хабарлама таратты, деп жазады inbusiness.kz.
"БАҚ-та Қазақстанға 2021 жылы Ресей қару-жарағы мен әскери техникасын жеткізу жөнінде ақпарат таралуда. 2021 жылы Ресей тарапынан Қазақстан Қарулы Күштерінің мүддесі үшін "Орлан-10Е" ҰҰА көпфункционалды кешенін ғана жеткізетінін хабарлаймыз.
Сонымен қатар Қазақстан өткен жылдары Су-30СМ ұшақтарын, Ми-35М тікұшақтарын, "Бук-М2Э" зениттік зымыран кешенін, БТР-80 және БТР-82А бронетранспортерлерін, сондай-ақ атыс қаруларын сатып алған. Бұған қосымша ел әскерінің қару-жарақ құрамында жеңіл брондалған "Тайфун-К" автокөліктері жоқ екенін хабарлаймыз", – деп жазылған ведомство хабарламасында.
Бұған дейін сайтымызда "Биыл Қазақстан Ресейден қандай әскери техника мен қару-жарақ сатып алды" деген тақырыпта ақпарат шыққан болатын. Алайда Қорғаныс министрлігі Дмитрий Шугаевтың сөзін жоққа шығарып отыр.
