Еліміздегі ақылы жолдар мемлекеттік-жекеменшік әріптестік жүйесі арқылы салынады, деп хабарлайды 24.kz.
Түскен пайда түгелдей бюджетке аударылып, кейін инвесторлардың шығыны кезең-кезеңімен өтеледі. Ауқымды жоспар аясында алдағы жылдары жалпы ұзындығы 5,5 мың шақырым жолды ақылы жүйеге көшіру көзделіп отыр. Сөйтіп, 2020-2021 жылға қарай түскен табыс 30 миллиард теңгені құрайды деген болжам бар.
Айта кетейік, "Астана-Теміртау", "Алматы-Қапшағай" және "Алматы-Қорғас" көлік дәліздері ақылы негізге бұған дейін жоспарланған бірінші тоқсанда емес, екінші тоқсанда толық іске қосылатын болды.
"Осы жылы 500-ден астам шақырым жол іске қосылады. Жалпы келе жатқан 3-4 жылдың ішінде 4 мыңнан астам жаңа жол салынатын болады. Ол жолда 100 мың жұмыс орны болады. Сондықтан бұл бағдарламаның экономикамызға маңызы өте жоғары", - дейді ҚР инвестициялар және даму министрі Жеңіс Қасымбек.
Айта кетсек, былтыр елімізде республикалық маңызы бар 600 шақырым жол салынды.
