KAZENERGY Қазақстандық мұнай-газ және энергетикалық кешен ұйымдары қауымдастығының төрағасы болып Мағзұм Мирзағалиев сайланды, деп хабарлайды inbusiness.kz сайты қауымдастықтың баспасөз қызметіне сілтеме жасап.
"Тиісті шешім 8 желтоқсанда Алматыда өткен KAZENERGY кеңесінің жеке отырысында қабылданды. Қазақстандық мұнай-газ және энергетикалық кешен ұйымдарының қауымдастығы KAZENERGY мұнай саласындағы кәсіпкерлікті дамытуды қолдау үшін 2005 жылы 2 қарашада құрылды", - делінген хабарламада.
Бұған дейін бұл қызметті Тимур Құлыбаев атқарған болатын.
Бүгінде қауымдастық мұнай-газ, электр энергетикасы және атом өнеркәсібі салаларында жұмыс істейтін компанияларды біріктіреді. Қауымдастықтың мақсаты – әлемдегі және Қазақстан Республикасындағы энергетикалық және экологиялық саясаттағы басымдықтардың өзгеруі жағдайында Қазақстан Республикасының энергетика (мұнай-газ және электр энергетикасы) саласының тұрақты және теңгерімді дамуына жәрдемдесу.
