Алматы әкімдігінің заңсыз әрекеті туралы танымал заңгер Бақытжан Базарбек Facebook желісінде мәлім еткен болатын.
Оның өтініші негізінде департамент әкімдікке қатысты тексеру жүргізді.
Ведомствоның мәліметінше, 2017 жылдың 1 тамызында әл-Фараби атындағы ҚазҰУ Алматы қаласы әкімдігіне Әл-Фараби даңғылы, 71 бойындағы жер телімінің шекарасын түзету туралы өтінішпен жүгінген.
ҚазҰУ өз аумағын 73,2-ден 72,1 гектарға дейін қысқартуды жоспарлаған еді.
Алматы жер комиссиясы екі күннің ішінде оң қорытынды шығарып, 5 тамызда жер паркинг салу үшін "Omirex" ЖШС-ға қысқа мерзімді пайдалануға берілген.
Телім әл-Фараби даңғылының бойында 69/5 және 69/7 деген екі дербес учаскеге бөлінді. Ведомство 2018 жылы бұл компанияның жарғылық капиталы "Аркада Impex" ЖШС-не кеткенін, содан кейін бұл жаңа ЖШС "Atlas Development" атауына ие болғанын түсіндірді.
ҚазҰУ аумағын қысқарту жобасы бекітілгеннен кейін, 2017 жылғы 2 қазанда жалпы үлестік жер телімін тұрақты пайдалануға беру туралы қаулы қабылданып, аумақ ҚазҰУ-ға берілді. Ал 2017 жылғы 28 қазандағы шешімінен кейін "жоғарыда көрсетілген 2017 жылғы 2 қазандағы шешімінің қолданылуын тоқтата отырып, 10 жыл мерзімге уақытша өтеулі ұзақ мерзімді ортақ үлестік пайдалануға беру туралы шешім шығарылған.
"Алматы қаласы бойынша жер телімдерін беру жөніндегі комиссия отырысының 2017 жылғы 3 тамыздағы хаттамасы және Алматы қаласы әкімінің 2017 жылғы 2 қазандағы қаулысы Заңның 14, 15, 20 және 135-баптарын бұзады", – деді ведомствода.
Басқармада түсіндірілгендей, Білім және ғылым министрлігінің келісімінсіз мұндай шешім қабылдауға болмайды.
"Азаматтық кодекстің 200-бабының 1-тармағына сәйкес шаруашылық жүргізу құқығындағы мемлекеттік кәсіпорын меншік иесінің немесе ол уәкілеттік берген мемлекеттік органның жазбаша келісімінсіз мүлікті иеліктен айыруға немесе оған өзге тәсілмен билік етуге, жалға беруге құқығы жоқ", – деп түсіндірді департаментте.
