Энергетика министрі Ерлан Ақкенженов бензин бағасына қатысты сұраққа жауап берді, деп хабарлайды inbusiness.kz сайты.
Биылғы ақпанда жанар-жағармай нарығындағы мемлекеттік реттеуден бас тартқан соң, баға нарық заңдарымен реттеледі.
"Әр жанармай құю бекеті өз шығындарына қарай бағаны көтереді. Бағаны өзгерту тәртібі бекітілген. Өнімнің өзіндік құны өзгерген жағдайда, соңғы баға да өзгереді", – деді министр Мәжіліс кулуарында.
Ерлан Ақкенженовтің сөзінше, Үкімет енгізген мораторийден кейін жанармай бағасы қазіргі деңгейде бекітілген.
"Үкімет жанармай бағасына мораторий енгізу туралы шешім қабылдады. Біз барлық жанармай сатушыларына бағаны қазіргі деңгейде ұстауды тапсырдық", – деді ол.
Ведомство басшысы келесі жылы баға қалай құбылатынын айта алмайтынын жеткізді.
