Жоспар бойынша әуежай биыл желтоқсан айында пайдалануға беріліп, Астана, Алматы және Батыс өңірлерге рейстер ашылмақ, деп жазады inbusiness.kz сайты.
Жаңа әуежай – Жаңаөзен қаласынан 52 шақырым, ал Кендірлі курорттық аймағынан 14 шақырым жерде орналасқан. Аумағы – 599 гектар. Қазір құрылыс басында 80-нен астам адам еңбек етіп жатыр. 62 техника жұмылдырылған. Тағы қосымша жұмысшылар келгенде, құрылыс жұмыстары екі ауысымға көшеді.
– Жоба аясында 2200 метр ұшу-қону жолағын салу қарастырылған. Әуежайдың өткізу қабілеті сағатына 150 жолаушыны құрайды. Сондай-ақ биыл Ақтау әуежайының ұшу-қону жолағының жөндеу жұмыстары аяқталады. Бұл ішкі және халықаралық рейстер санын көбейтуге септігін тигізеді", – деді Көлік министрі Марат Қарабаев.
Жалпы әуежайдың құрылысына жоба бойынша – 34,5 млрд теңге қаражат қарастырылған. Бүгінгі таңда аталған қаражат толықтай қамтамасыз етілген, бөлінген. Дәл қазір Жаңаөзен–Кендірлі–Әуежай арасындағы инженерлік инфрақұрлымның жобасы жасалып жатыр.
