Жаңа жағалау бұрынғыдай тек серуендеуге арналған орын емес. Ол бүгінде демалыс, спорт және мәдени іс-шаралар өткізуге арналған заманауи көпфункционалды кеңістікке айналды. Бұл туралы inbusiness.kz ішкі саясат басқармасына сілтеме жасап хабарлайды.
Жағалауда ұзындығы 12 шақырымнан асатын вело және жүгіру жолдары, ашық аспан астындағы амфитеатр, скейт-парк, арқан жолдары, спорттық және балалар ойын алаңдары, жарықтандыру жүйесі, демалысқа арналған беседкалар, көше навигациясы мен гастроаймақ орналастырылған. Жоба "Қазцинк" АҚ-ның қолдауымен жүзеге асырылды.
Салтанатты ашылу мерекелік форматта өтті. Таңертеңгісін алаңда фермерлік жәрмеңке ұйымдастырылып, Ақмола мен Түркістан облыстарынан және Тәжікстаннан келген 30-дан астам шаруашылық өз өнімдерін ұсынды. Ұйымдастырушылардың айтуынша, жәрмеңке барысында 320 тоннадан астам ауыл шаруашылығы өнімі — жеміс-жидек, көкөніс, бал және сүт өнімдері сатылған. Бағалар нарықтағыдан 10–15 пайыз төмен болды.
Мерекенің ең әсерлі сәттерінің бірі — балаларға арналған балмұздақ тарату акциясы болды. "Гормолзавод" ЖШС-нің бастамасымен бір тонна балмұздақ тегін таратылды. Бұл шара Қазақстан рекордтар кітабына бір шара аясында ең көп балмұздақ таратылған оқиға ретінде тіркелді. Тоңазытқыштар алаңның әр жеріне қойылып, акция ертегі кейіпкерлерінің шеруімен және түрлі балаларға арналған ойын-сауықтармен бірге өтті.
Ақмола облысының әкімі Марат Ахметжанов бұл шараны Халықаралық балаларды қорғау күнімен орайластырып: "Бұл мейрам — балалардың күлкісі мен бақытынан артық ештеңе жоқ екенін еске салатын ерекше күн. Өскелең ұрпақтың дамуы мен қауіпсіздігі — біздің басты міндетіміз. Біз жаңа балабақшалар мен мектептер салып, оқушылар сарайлары мен спорт алаңдарын ашып жатырмыз", — деді.
Жәрмеңке мен рекордтық шарадан бөлек, күні бойы жағалауда түрлі шеберлік сабақтары, батпырауықтар парады және костюмді шеру өтті. Кешкісін эстрада жұлдыздары Sadraddin мен Дастан Оразбеков қатысатын концерт ұйымдастырылып, мереке фейерверкпен аяқталды.
Алдын ала мәлімет бойынша, бұл іс-шараға бірнеше мың адам қатысқан. Қала билігінің мәлімдеуінше, жаңартылған жағалау алдағы уақытта Көкшетаудың басты мәдени және демалыс аймағына айналып, тұрғындар мен қонақтар үшін тартымды орын болады.
