Көкшетауда жүргізуші куәлігінен айырылған ауыл тұрғыны мас күйде көлікті айдаған, деп жазады inbusiness.kz 716.kz порталына сілтеме жасап.
Ресурстың жазуынша, биылғы 16 қазанда сағат 04.00-де патрульдік полиция қызметкерлері аулалардың бірінде "Mercedes-Benz" автокөлігін тоқтатты. Құжаттарды тексеру барысында полицейлер Жақсы ауданының Моховое ауылының 25 жастағы тұрғыны былтыр сот шешімі бойынша 7 жылға жүргізуші куәлігінен айырылғанын анықтады.
"Медициналық куәландыруға сәйкес ер адам орташа дәрежеде мас халде екені анықталды. Бұл дерек бойынша ер адамға қатысты ҚР ҚК 346-бабы бойынша сотқа дейінгі іс жүргізу басталды", - деп хабарлады Ақмола облыстық полиция департаментінің баспасөз қызметі.
Жыл басынан бері облыс аумағында көлік құралын алкогольдік күйде басқарғаны үшін (ҚР ӘҚБтК 608-бабы) 1582 адам жауапкершілікке тартылған.
Бұдан бөлек полицейлер көлік құралын басқару құқығынан айырылғанына қарамастан, көлікті масаң күйде басқарудың 81 фактісін анықтады.
