Бұл туралы Аэроғарыш комитетінің төрағасы Баубек Оралмағамбетов Орталық коммуникациялар қызметінде өткен брифингте айтты, деп жазады inbusiness.kz.
"KazEOSat-1 мен KazEOSat-2 кепілдігі бойынша 2021 жылға дейін болған. Бірақ техникалық инженерлер мұның бәрін қарап, олардың қолданылу уақытын осы жылдың соңына дейін ұзартқан. Біздің болжамға сәйкес, 2026-2027 жылдарға дейін қазіргі ұшып жүрген жер серіктеріміз жұмыс істеуі керек. Бірақ та, оларды ауыстыру қажет. Биыл біз KazEOSat-MR деген 3 спутникке контракт жасадық, ол 2026 жылы ұшуы керек. KazEOSat-1 – аса үлкен дәлдікпен істейтін спутник. Оны ауыстыру үшін құжаттарды дайындап жатырмыз", - деді ол.
Сөзінше, келесі жылы тапсырыс беру жоспарланып отыр.
"Қазіргі спутниктер істен шықпай тұрғанда оларды өзіміздің жер серіктерге ауыстыру бағытында жұмыс жүргізудеміз", - деп жалғастырды Баубек Оралмағамбетов.
Айта кету керек, қаңтар айында депутат Екатерина Смышляева KazEOSat-MR спутниктерін құру жобасы тоқтап тұрғанын айтып, депутаттық сауал жолдаған болатын.
