Таяуда ғана қаскөйлердің қолынан қаза тапқан ұлын жер қойнына тапсырған Қаржаубай Нұрымов араға уақыт салып, інісінен белгісіз жағдайда айырылып қалды, деп хабарлайды inbusiness.kz сайты.
Ол Нұрқанаттың өз-өзіне қол жұмсағанына күмәнмен қарайды.
Қайғыдан көңілі қарыс айырылған ол інісінің көлігі тұрған жер мен өлген жерін көрсетіп, видео жариялады.
Қаржаубай інісінің тік жардан түскеніне сенбейді. Себебі жардың биіктігі шамамен 7-10 метр айналасында екен.
"Мынау біздің Азат ауылы, Шерзаттың жатқан жері. Бір кісілер "автокөлік осында" дегеннен кейін біз түнде осы биікке келдік. Мына жерде автокөлік есігі ашық тұр екен. Екі телефоны бар. Көлік оталып тұрған секілді болды (анық түсіне алмадым). Осы жермен жалғыз із жүреді де, жардан түседі. 7-10 метр жардан адамның түсуі мүмкін емес. Осы жерден түсіп, 700 метрдей жермен тас жолға қарай жақындайды", – дейді Қаржаубай Нұрымов.
Бір таңқаларлығы Қаржаубайдың сөзінше, марқұмның көлігі тұрған жер мен өлген жерінің арасы бір шақырымдай.
Ол жардан түскеннен кейін жардың ішімен жүріп, тасжолды бетке алған.
"Жардың бойымен түскен. Ізді қуалап жүрдік. Шақырымға жақын жүрген. Түнде жалғыз өзі біздің үйге жақын жерге, бетонның артына барған. Жіңішке талдың артында екі аяғы жерге тиіп, бүктеліп отырған жерінен таптым. Оның мойнында жарық диодты сым болды. Бұтаққа байланған. Еркін отыр. Механикалық асфиксияның бір жағында ғана ізі тұр. Осы жерден бауырымды алып шықтым", – дейді ол.
Қаржаубайдың көңілінде інісінің өліміне қатысты күдік көп.
"Түнде көлігін қалдырып, есігін ашып, не себепті келді деп ойлайсыздар? Міне, менің бар шындығым. Әркім әртүрлі айтады ғой. Шын айтты, өтірік айтты деп. Аққа Құдай жақ. Сабыр сақтайық, Алланың бұйырғаны болады – дейді Шерзаттың әкесі.
