Қазақстан, Ресей, Өзбекстан және Беларусь көлік министрліктерінің өкілдері ТМД-ға қатысушы мемлекеттердің көлік кеңесінің 43-ші отырысы аясында кездесті, деп хабарлайды inbusiness.kz сайты.
Іс-шараға қатысушылар "Беларусь – Ресей – Қазақстан – Өзбекстан – Ауғанстан – Пәкістан" халықаралық көлік дәлізін қалыптастыру және дамыту мәселесін талқылап, аталған дәлізді дамыту жөніндегі іс-шаралар жоспарын қарастырды. Кездесу барысында тараптар биыл наурыз айының ортасында жұмыс тобының бірінші отырысын өткізуге келісті.
Естеріңізге сала кетейік, өткен жылы ШЫҰ-на мүше елдердің көлік форумы шеңберінде Қазақстан, Ресей және Өзбекстан министрліктерінің өкілдері "Беларусь – Ресей – Қазақстан – Өзбекстан – Ауғанстан – Пәкістан" дәлізі туралы Меморандумға қол қойған болатын.
Іс-шараның қорытындысы бойынша қатысушылар "Дарбаза-Мақтарал" жобасының іске асырылуын ескере отырып, қазақстандық учаскенің инфрақұрылымы осы дәліз бойынша жүктерді тасымалдауды қамтамасыз етуге мүмкіндік береді деген ортақ пікірге келді.
