Колумбияның тәртіп сақшылары салмағы 4928 килограмм кокаин есірткісін тәркіледі. Бұл партия Түркияға жіберілмек болған екен. Мұны елдегі ұлттық полицияның есірткімен күрес қызметінің директоры Хорхе Ремирес айтты. Кокаин хлоргидраты түйіршіктелген каучукпен араластырылған көрінеді.
Колумбияның қорғаныс министрі Карлос Холмс Трухилью есірткі партиясының құны нарықтағы бағамен есептегенде 265 миллион доллардай тұратынын айтып, арнайы операцияны сәтті аяқтаған әріптестеріне алғысын жеткізді.
Ескере кететін жайт, әлемдегі кокаин плантацияларының 90% Анд есірткі үшбұрышы деп аталатын жерде шоғырланған. Бұл үштікке Колумбия, Боливия және Перу кіреді. Сондай-ақ Бразилияның солтүстік-шығысында, Венесуэланың оңтүстік-батысында, Панама мен Эквадор плантацияларында есірткінің осы түрі өсіріледі.
Табиғат Нұрболат
