Бас жоспардың негізгі мақсаты – оның барлық элементін өзара байланыстыра отырып, өнеркәсіптік-коммуналдық және рекреациялық аймақтарды ұтымды бөліп, жайлы және қауіпсіз тіршілік ортасын құру, деп жазады inbusiness.kz Үкіметтің баспасөз қызметіне сілтеме жасап.
Жоспарды іске асырудың есептік кезеңі 2050 жылға дейін жалғасады.
Өңірдің көлік-логистикалық жүйесін жаңғыртуға және одан әрі дамытуға жақсы серпін берілетін болады.
Қонаев қаласының авиация, теміржол, жол және су көлігін қолданудағы көлік-логистикалық жүйесінің мультимодальдығы оны Алматы облысындағы орталық көлік-логистикалық хабқа айналдырмақ.
Жасыл электр энергиясын өндіру көздері – Қонаев қаласының индустриялық-инновациялық дамуының маңызды аспектісі.
Қаланың әлеуметтік саласын дамытудағы басымдық – оны Алматы облысының және өңірдің туризм, демалыс, спорттық демалыс орталығы статусына сәйкес келетіндей етіп дамыту.
Жоспарды іске асыру кезінде жалпы ауданы 2 538,2 мың м2 жаңа тұрғын үй салынбақ.
Өзін-өзі жұмыспен қамтығандар деңгейін 18%-ға, жалпы жұмыссыздық деңгейін 4,2%-ға, жастар арасындағы жұмыссыздықты 3,8%-ға дейін төмендету жоспарланып отыр.
Жоспар аясында мектепке дейінгі және жалпы білім беретін мекемелер санын екі есе көбейту көзделіп отыр.
Денсаулық сақтау жүйесінде тәулік бойы жұмыс істейтін стационарлардағы төсек-орын саны, амбулаториялық-емханалық көмек көрсететін нысандар, сондай-ақ жедел жәрдем станциялары мен көліктер саны екі есе артады.
