Әкімінің баспасөз қызметінің хабарлауынша, қазіргі таңда Қаракемер, Масаншы, Бұлар батыр, Сортөбе, Қарасу, Ауқатты ауылдарының барлық кіріс-шығыстарына блог-постар қойылып, көшелерде қоғамдық тәртіпті сақтау жұмыстары жүргізілуде.
"Орын алған төтенше жағдай салдарынан 30 тұрғын үй мен 17 коммерциялық нысан және 47 автокөлік өртенген десек, бүгінде алдын-ала жасалған есептеулерге сәйкес, келтірілген залал көлемі анықталуда",– делінген хабарламада.
Сондай-ақ Масаншы, Сортөбе, Бұлар батыр ауылдарында қақтығыстан зардап шеккен азаматтармен жұмыс жасау мақсатында, арнайы топтар құрылып, мобильді халыққа қызмет көрсету қызметі ұйымдастырылған.
"Кеше 2 азаматқа жеке куәлік, 320 балаға шекарадан өтуге анықтама, 45 неке туралы куәлік, 6 азаматқа жылжымайтын мүліктерге құжаттар берілді. Бұл жұмыс күнделікті жалғасын табуда",– дейді баспасөз қызметінен.
Көше бойындағы өртенген автокөліктерді, қоқыстарды тазалау жұмыстары толық аяқталған, әлеуметтік нысандар, яғни, мектептер мен балабақшалар, сауда орындары мен дәріханалар қалыпты жағдайда жұмыс жасауда.
Айта кетсек, аталған ауылдардағы зардап шеккен тұрғындарға Жамбыл ауданы, Жалпақтөбе ауылынан Қазақстан Ассамблеясы мүшелерінің ұйымдастыруымен 20 тонна көлемінде гуманитарлық көмек жетсе, Алматы қаласының маслихат қызметшілері "Қызыл ай" қорымен бірлесе 54 бөтелке ауыз су, 124 кг ұн, 60 қорап азық-түлік пен өзге де қажетті заттарды жолдаған.
Сондай-ақ, Жамбыл облысының "Вынхуа" этномәдени бірлестігінің волонтері Парса Рамазан қаза болған 4 отбасының мүшелеріне 400 мың теңгеден материалдық көмек көрсетіп, азық-түлікпен қамтамасыз еткен.
