"QazAvtoJol" ҰК" АҚ басқарма төрағасы Ұлан Әліпов Жамбыл облысындағы іс-сапары барысында
Қордай өткізу пунктіндегі жұмыстардың қарқынын тексерді.
Жамбыл облысының Қордай ауылдық округіндегі өткізу пунктінің құрылысы мен қайта жаңартылуы биылғы жылдың соңына дейін аяқталады деп жоспарлануда. Бүгінде жұмыстардың 70%- жүзеге асқан. Бас мердігер – "Дорстрой" ЖШС. Ал техникалық бақылау – "Алматы Сапа Инжиниринг" ЖШС.
"Өткізу пунктінің қайта жаңартылатын аймағы – 3,5 гектар. Жолдың қозғалыс бөлігі – 137 метр, әр жолағы 3,75 метрден 8 жолақ бар. Жоба аясында жолдың қозғалыс бөлігін, өткізу терминалдарын, кедендік қызметтің ғимаратын және өткізу пунктіне қарасты өзге де нысандарды қайта жаңарту көзделген. Сондай-ақ, шекарадан өткен азаматтарды тексеру жұмысын жылдам жүргізуге арналған жаңа инспекциялық-тексеру кешенінің құрылысы да аяқталуға жақын. Нысанда терминалдарды әрлеу жұмыстары жалғасуда", - деді Ұлан Әліпов.
Қайта жаңарту жобасын жүзеге асыру үшін 172 білікті маман мен 16 арнайы техника жұмылдырылған.
Құралай Құдайберген
