Жамбыл облыстық прокуратурасы "Қоспаев" ұйымдасқан қылмыстық тобы" деген атпен танылған ұйым мүшелерін шекарадан заңсыз өткізіп жіберген күдіктінің сотталғанын хабарлады, деп хабарлайды inbusiness.kz.
Қадағалау органы мәліметінше, адамдарды өткізуді ұйымдастырған - М.А. Машанло. Ол былтыр тамызда Руслан Шалин, Ерлан Имашев және Елдос Қоспаевқа Қырғызстанға өтуге көмектескен. Шекарадан заңсыз өту дерегі Сортөбе ауылы маңындағы бақылау-өткізу бекеті аумағында болған.
"Қоспаев бастаған Шалин, Имашев ҰҚТ мүшелері және бұған дейін Қаржы мониторингі агенттігі Қылмыстық кодекстің 249 ("Рейдерлік") және 262-бабы ("Қылмыстық топты ұйымдастыру және оған қатысу") бойынша қылмыс жасағаны үшін халықаралық іздестіру жарияланғанын атап өткен жөн", - деді ведомство өкілдері.
Өз кезегінде Машанлоны аудан прокуратурасының жанынан құрылған ведомствоаралық тергеу-жедел тобы әшкереледі. 25 сәуірдегі сот үкімімен ол Қылмыстық кодекстің 394-бабы 2-бөлігі бойынша кінәлі деп танылып, 2 жыл 6 айға бас бостандығынан айырылды.
