/img/tv1.svg
RU KZ
Қордайдағы қақтығысқа қатысты тергеу жұмыстары аяқталды

Қордайдағы қақтығысқа қатысты тергеу жұмыстары аяқталды

Бердібек Сапарбаев ұсталғандардың туыстарының барлық өтініші назардан тыс қалмайтынын, прокуратура, құқық қорғау және жергілікті атқарушы органдармен қаралатынын атап айтты. 

04 Тамыз 2020 11:26 232

Қордайдағы қақтығысқа қатысты тергеу жұмыстары аяқталды

Жамбыл облысының әкімі Бердібек Сапарбаев Қордай ауданындағы тәртіпсіздіктерге қатысы бар деген күдікпен ұсталғандардың ата-аналары және туыстарымен кезекті рет кездесті, деп хабарлайды әкімнің баспасөз қызметі.

Аймақ басшысы Қаракемер және Сортөбе ауылдарында жергілікті тұрғындармен бірқатар кездесулер өткізді.

Бердібек Сапарбаев ұсталғандардың туыстарының барлық өтініштерінің назардан тыс қалмайтынын және прокуратура, құқық қорғау және жергілікті атқарушы органдармен қаралатынын атап айтты. Барлық  өзекті мәселелер Қазақстан заңнамасы аясында шешілуге тиіс екендігін атап өтті.

«Біз болған қайғылы оқиғалар 11 адамның өліміне әкеліп соқтырғанын, екі жүзге жуық адам жарақат алғанын, азаматтарымыздың мүлкі зардап шеккенін ұмытпауымыз керек. Сіздердің барлық өтініштеріңіз қаралады, ұсталғандармен кездесулер мен телефон арқылы сөйлесулер ұйымдастырылады. Құқық қорғау органдары тергеу жұмыстарын аяқтады, ол материалдармен тараптар таныстырылуы керек. Заңды бұзған және олардың кінәсі дәлелденген адамдардың бәрі жазалануы қажет екенін тағы да айтқым келеді. Барлығы заң бойынша болуы керек. Бұл мәселе Мемлекет Басшысы Қасым-Жомарт Тоқаевтың жеке бақылауында», – деп атап өтті Сапарбаев.

Сонымен қатар, Бердібек Сапарбаев жергілікті тұрғындармен болған әңгіме барысында мемлекет тарапынан қомақты қаражат бөлініп, жергілікті атқарушы органдар Қордай ауданындағы ауылдарды дамыту бағытында ауқымды жұмыстар атқарып жатқандығын атап өтті.

Мәселен, Қаракемер және Масаншы ауылдарындағы әлеуметтік нысандарды абаттандыру мен  салу үшін қосымша 3 миллиард теңге бөлінген. Тұрғын үйлер, спорт және балалар алаңдары, дәрігерлік амбулатория, мектеп, көшелер салынып, газ құбыры, сумен жабдықтау желілері тартылып, жөнделуде.

Қордай оқиғасы бойынша тергеудің алдын ала қорытындылары жарияланды

Полицейлерге күш қолданғандар 1,5 жылға бас бостандығынан айырылды.  

27 Наурыз 2020 19:38 553

Бас Прокурордың орынбасары Ерлік Кененбаев Қордайда болған қайғылы оқиға бойынша жүргізіліп жатқан тергеудің алдын ала қорытындыларын жариялады.

«Кикілжің тек тұрмыстық негізде болды. Биылғы жылы 5 ақпан күні Сортөбе ауылында автокөлік жолында болған оқиға кезінде егде тартқан адам жарақат алды. Осы оқиға барысында қылмыс жасады деген айыппен екі адам күдікке ілінді. Біреуі сот санкциясымен қамауға алынды. Жақында тергеу амалдары аяқталып, істі сотқа жібереміз. Осы ауылдың бір тұрғыны 7 ақпан күні Хонда Одиссей автокөлігімен полиция талабын орындамай, үйіне кетіп қалады. Үйінің жанында ол адам туыстарымен бірге полиция қызметкеріне күш қолданды. Ол күдіктілер сот санкциясымен тұтқындалады. Ал 2020 жылдың 18 наурызындағы сот үкімі бойынша ол үш адам айыпты деп танылып, әрқайсысы 1,5 жылға бас бостандығынан айырылды», – деді ол.

Ерлік Кененбаевтің сөзінше, шиеленісті қылмыстық топтар өз мүдделеріне пайдаланған.

«Осы оқиғадан кейін жергілікті тұрғындар жағымсыз хабарламаларды әлеуметтік желілер мен месенджерлер арқылы таратты. Бұл жағдайды қылмысты топтар пайдаланып, халықты әлеуметтік жікшілдікке үгіттеп, күш көрсетуге шақырды. Жалған хабарламаларға сенген жергілікті тұрғындар мен басқа өңірлерден келген адамдар 8 ақпанға қараған түні Масаншы, Бұлан батыр және Ауқатты ауылдарына жиналып, тәртіпсіздік орнатты», – деген Ерлік Кененбаев адам шығыны да болғанын еске алды.

Бас Прокурордың орынбасарының мәліметінше, бүгінгі күні тергеп-тексеру жұмыстары әлі де жалғасуда.

«Қылмыстық істерді тергеу барысында сот санкциясымен 7 тұлға қамауға алынды. Бүгінгі күні Жамбыл облысы аумағында, Алматы, Шымкент қалаларында жаппай тәртіпсіздіктің ең белсенді 25 адам қатысушысы тұтқындалды. Олардың арасында қазақтар, дүнгендер, қырғыздар бар. Олардың жетеуі бұрын сотталған. Тергеу жалғасуда әрі ерекше бақылауға алынды», – деп атап айтты Ерлік Кененбаев.

Оның айтуынша, бүгінгі күні Қордай ауданында жағдай тұрақты.

Нұржан Көшкін

Қордайда өртенген ғимараттан табылған мәйіттің кім екені анықталды

 Ол хабар-ошарсыз кеткен 20 жастағы Мұрат Масанов болып шықты.

05 Наурыз 2020 13:05 311

Қордай ауданы Масанчи ауылындағы өртенген ғимараттың ішінен табылған мәйіттің кім екендігі белгілі болды. Бұл туралы облыстық полиция департаментінің баспасөз қызметіне сілтемемен ҚазАқпарат хабарлайды.

«Биылғы жылдың 11 ақпанында Масаншы ауылындағы өртенген сауда ғимаратынан табылған адам сүйектеріне қатысты жүргізілген генетикалық сараптама нәтижелері бойынша көз жұмған адамның жеке басы анықталды. Ол хабар-ошарсыз кеткен 20 жастағы Мұрат Масанов болып шықты. Оның жоғалғаны туралы полицияға 9 ақпан күні әкесі xабарлаған»,– делінген ведомство мәлімдемесінде.

Сондай-ақ, адам өлімінің мән-жайы бүгінгі таңда жүргізіліп жатқан сотқа дейінгі тергеп-тексеру барысында анықталмақ.

Еске сала кетсек, биыл 7 ақпанда Қордай ауданындағы Масаншы ауылында  жаппай төбелес болған. Ал 8 ақпанда Мемлекет басшысы Жамбыл облысындағы оқиғаға байланысты мәлімдеме жасады. Мемлекет басшысының тапсырмасымен Қордай ауданындағы оқиға салдарын жою жөніндегі Үкімет комиссиясы құрылды.