Қорғаныс министрлігінің бұрынғы қызметкері Президенттен араша сұрады

8898

Қорғаныс министрлігінің Заң департаментінің бұрынғы басшысы Ерімбет Ерболат жазықсыз қатаң жазаланғаны үшін ҚР Президенті Қасым-Жомарт Тоқаевтан көмек сұрап, бейнеүндеу жасады, деп жазады inbusiness.kz

Қорғаныс министрлігінің бұрынғы қызметкері Президенттен араша сұрады

Оның айтуынша, сот бір жылдан асқан тергеу амалдары нәтижесінде оған нақты дәлелсіз ауыр жаза тағайындаған. Істі қарау барысында бірнеше өрескел қате жіберілгенімен, сот адвокаттардың уәжін ескерусіз қалдырған.

Өмірінің 20 жылын адал мемлекеттік қызметке арнаған экс-шенеунік заңсыздықтың құрбаны болғанын айтады.

"Менің басымнан өткен соңғы оқиғалар ешқандай ақылға қонымсыз. 5 министрмен жұмыс істедім, прокуратурада жұмыс істедім. 2019-2020 жылдары Қорғаныс министрлігінде Заң департаментінің басшысы болып жұмыс істеген кезде біз жаңа алгоритм әзірледік, соның арқасында мемлекеттік сатып алулардың ашықтығы 70 пайызға артты. Нәтиже бірден көрінді. Атап айтқанда, жеткізушілер саны бес есеге өсті. Бюджетті үнемдеу 4 млрд теңгені құрады. Бірақ бұл шара Бас әскери прокуратураға ұнамады. Артынша олар сот арқылы бұл алгоритмді ішінара жойды. Осы оқиғадан кейін Әскери прокуратураның мені қудалауы басталды. Министрдің орынбасары екеуміздің телефондарымыз тыңдалды. Алайда олар бірде-бір заңсыз факті мен әрекетті таппаса да, менің үстімнен "пара алды" деген айыппен қылмыстық іс қозғады", – деді ол өзінің бейнеүндеуінде.

Жуырда Президент Qazaqstan телеарнасына берген сұхбатында "құқық қорғау жүйесі "шаш ал десе, бас алу" қағидасымен жұмыс істеп жатқанын" айтқан болатын.

Ерімбет Ерболатты да судья Қайыров айыпты деп танып, 8 жылға бас бостандығынан айырған. Ал жала жапқан 2 адамға, атап айтқанда, біреуі бұрын парақорлық үшін сотталған және тергеуге тәуелді адамға, судья ең төменгі жаза тағайындады (50-70 миллион теңге айыппұл). Бұл Қылмыстық кодекстің 367-бабында көрсетілген ең төменгі шекті мәннен 6-8 есе төмен.

Бейнеүндеу авторы аппеляцияға бергенімен, сот оны 7,5 жылға бас бостандығынан айырған. Оның үстіне, сот Е. Ерімбетовтың міндеттеріне мүлдем кірмейтін нәрсе үшін жаза тағайындаған.

"Бұл абсурд, өйткені мұндай жаза кісі өлтірушілерге, террористтерге немесе халықтың миллиондаған ақшасын ұрлағандарға беріледі. Пара алу фактісі жоқ, үкімнің барлығы болжамға негізделген. Құрметті Мемлекет басшысы! Президент Әкімшілігінің тиісті бөлімдеріне және Бас прокуратураға менің ісімді қарап, зерделеуді, объективті құқықтық баға беруді тапсырсаңыз, менің сөздерімнің шынайы екенін көресіз. Соттың қызметіне араласуға болмайтынын түсінемін. Дегенмен Жоғарғы соттың конституциялық сатысына орынды бағыт-бағдар беріп, назар аударуыңызды сұраймын", – дейді Е. Ерімбет.

Еске сала кетейік, Мемлекет басшысының араласуымен қаңтар оқиғасынан кейін тұтқындалғандардың 1/3 бөлігі бостандыққа шығып, көпшілігінің жазасы жеңілдетілген болатын.

"Құрметті Қасым-Жомарт Кемелұлы! Мен Сізге сенемін. Араша түсуіңізді өтінемін", – деп аяқтады өз сөзін Е. Ерболат.

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу