Еліміздің бас санитарлық дәрігері Жандарбек Бекшиннің айтуынша, коронавирус сәлем-сауқат пен азық-түлік арқылы таралмайды, деп хабарлады Интерфакс-Қазақстан.
"Ашық ортада бұл вирус тірі қалмайды. Ұзақ дегенді ол бір тәулік қана өмір сүреді. Оның таралуы үшін ең тиімді ауа температурасы 36-37 градус. Яғни бұл вирус тек адам және жануар ағзасында ғана тірі қалады. Сондықтан оның азық-түлік немесе сәлем-сауқат тасымалдау кезінде таралу мүмкіндігі төмен", – деді Жандарбек Бекшин.
Еліміздің бас санитарлық дәрігерінің сөзінше, Қытайдан келетін тауарлар темір жол арқылы 2-3 күнде жеткізіледі. Яғни, бұл аралықта вирус тірі қалмайды. Сонымен қатар ол кез келген азық-түлікті тұтынбас бұрын оны жуып, жоғары температурада өңдеуді ұмытпау керектігін айтты.
"Ал жеміс-жидек сынды шикізатты ағынды суда жуып, ыстық сумен шайқау керек", – деді Жандарбек Бекшин.
