Елімізде COVID-19 пандемиясы кезінде неке қию саны 16%-ға төмендеп, ажырасу саны 3 есе азайды, деп хабарлайды inbusiness.kz тілшісі ranking.kz-ке сілтеме жасап.
2020 жылдың үшінші тоқсанында (қаңтар-қыркүйек) Қазақстанда 87,6 мың неке және 17,3 мың ажырасу тіркелді. Өткен жылдың осы кезеңімен салыстырғанда неке саны 15,7%-ға, ал ажырасу саны бірден 2,6 есеге азайған.
Алайда еліміздегі ажырасу динамикасын барлық мемлекеттік институт пен инстанция қалыпты жұмыс кестесіне оралып, карантин шектеулері алынғанда және халықтың әл-ауқаты бұрынғы қалпына келгенде талдау керек. Себебі, коронавирус кезінде ажырасқандар санының нақты картинасын кейін көруіміз мүмкін.
2020 жылдың қаңтар-қыркүйегінде ажырасу мен неке ара қатынасы рекордтық төмен деңгейде болды – 19,8%. Өткен жылы бұл көрсеткіш жоғары рекордтық теріс мәнге ие болған – 43,5%.
2020 жылдың қаңтар-қыркүйегінде еліміздегі некенің 69%-ға жуығы қалаларға тиесілі: 60,4 мың неке. Бұл өткен жылмен салыстырғанда 17,5%-ға аз. Ауылдардағы неке саны 11,6%-ға дейін азайды: 27,2 мың неке.
Осы кезеңде Қазақстандағы ажырасудың 73,4%-ы қалаларда тіркелді – 12,7 мың (бір жыл бұрынғы көрсеткіш - 73,3%) неке, ал ауылдарда – 26,6%: 4,6 мың неке. Осылайша, бір жылда қалалар мен ауылдардағы ажырасу саны 2,6 есе азайды.
Еліміздің барлық өңірінде неке саны азайды: Шымкент (-27,4%), Қостанай облысы (-19,8%), Алматы (-18,3%). Ең аз төмендеу Қызылорда (-10,2%), Павлодар (-10,5%) және Түркістан (-11%) облыстарында байқалды.
Сонымен қатар, барлық облыста да ажырасу саны аз болды. Ажырасу санының ең көп қысқаруы Қызылорда (4 есе), Атырау (3,7 есе) және Батыс Қазақстан (3,1 есе) облыстарында байқалды.
