Мысырда қалуға мәжбүр болған 17 жастағы қазақстандық елге аман-есен оралды. Бұл туралы "Туристік қамқор" қоры мәлім етті, деп хабарлайды inbusiness.kz ҚазАқпаратқа сілтеме жасап.
Төрт адамнан тұратын отбасы Мысырда демалған. Олар елге қайтатын кезде ПТР тест тапсырған. Үлкен ұлының тапсырған тесті оң нәтиже берген.
Туроператор ерлі-зайыптыларды ұлдарын Мысырда қалдырып, өздерін Қазақстанға оралуға көндірген.
"Баланың ата-анасы оны Мысырда тастап кеткені дұрыс болған, өйткені ол бортта екі жүзден астам адамға коронавирус жұқтыруы мүмкін еді. Бұл ретте туроператор барлық жауапкершілікті өз мойнына алды. Жасөспірім қонақ үйде қалды. Барлық шығынды қонақ үй басшылығы көтеріп алды",- деп хабарлады "Туристік қамқор" қорынан.
Қордағылардың айтуынша, оның келуі мен емделуіне кететін барлық шығындар туристердің мойнына түсті деген ақпарат – жалған.
"Олар жас туристке қамқорлық жасады, оны қолдады. Бұл бизнеске ең лайықты көзқарастың мысалы. Олардың ұстанымдарының арқасында бозбала орналасқан қонақ үйде тұру шығындарын өз мойнына алды. Трансфер толығымен туроператордың есебінен болды. Осы оқиғалар болған кезде туроператор жігітпен, оның ата-аналарымен үнемі байланысын үзген жоқ", - деп атап өтті қордағылар.
Сондай-ақ сақтандыру компаниясының икемділігі мен жауапкершілігі де айтылды. Ұйым хаттамаға сәйкес әрекет етті: ереже бойынша жас жігітті қонақ үй бөлмесінде оқшаулап, тамақпен қамтамасыз етті, оның жағдайын бақылап, тест ақшасын төледі.
Қазақстандық жасөспірім аман-есен елге оралды.
