Оның сөзінше, Дүниежүзілік банк Бішкекті көгалдандыру үшін 50 миллион доллар бөлген, деп хабарлайды inbusiness.kz сайты.
Осылайша, Қырғызстан Бішкек қаласын көгалдандыруға, суару жүйесін жаңғыртуға және шаң-тозаңмен күреске бағыт алатын жобаны іске қосты.
– Өткен аптада мен Бішкектегі жасыл желектерге инспекция жүргіздім. Вице-мэр Рамиз Алиевпен бірге "Жасыл шаруашылық" мекемесінің нысандарын араладық. Біз оларға суару жүйесін жаңғыртуға арналған құрал-жабдықтар сатып алып жатырмыз. Біздегі суару жүйесінің жағдайы өте нашар. Сонымен қатар, 18 су ұңғымасын бұрғылау жоспарланған, – деді министр Мэдер Машиев.
Сөз арасында ол Бішкек пен Шу облысындағы атмосфералық ауаның сапасын жақсарту мақсатында 2025-2026 жылдарға арналған іс-қимыл жоспары әзірленгенін де атап өтті.
Сондай-ақ, М.Машиев ел астанасындағы смогпен күрестің негізгі шараларының бірі – "Б3Ш" маркалы (қоңыр көмір, шлак) көмірді сатуға тыйым салу екенін жеткізді. Өйткені, ол ауаға ең көп зиян тигізетін негізгі ластаушының бірі саналады.
