Қостанай облысында 3 000 жуық волонтер су тасқынына қарсы іс-шараларға қатысуда, деп хабарлайды inbusiness.kz cайты.
Өңірдің барлық аймақтарында еріктілер жасақтары құрылып, 3 000 жуық волонтер су тасқынына қарсы іс-шараларға, халықты эвакуациялау және гуманитарлық көмек таратуға белсенді ат салысуда. Өңірлердегі еріктілердің жұмысын жастар ресурстық орталықтары үйлестіреді.
"7 сәуірдегі жағдай бойынша су басу қаупі жоғары аймақтарда жасақталған еріктілер саны 1 760 адамнан асқан. Қостанай қаласында 1 240 астам ерікті жұмылдырылған, 2 бағыт бойынша жұмыстар жүргізілуде: төсек жабдықтарын және т.б. жинап, Қостанай қаласы мен Қостанай ауданының эвакуациялық пункттеріне жеткізу, ыстық тамақ тарату. Қаптарды құммен толтырып, бөгет орнату", - деді Қостанай облысы жастар ресурстық орталығының директоры Абай Дүйсеков ОКҚ алаңында өткен брифингте.
Қазіргі уақытта өңірлердегі барлық еріктілер эвакуация туралы ескерту үшін үй-үйді аралап, бөгеттерді нығайту, арықтар мен су арналарын бұрып, азық-түлік жеткізу, қаптарды құммен толтыру, оңтүстік өңірлерде (Арқалық қ., Амангелді және Жангелді аудандары) гуманитарлық көмек тарату сияқты жұмыстарға жұмылдырылған.
