Биыл Қостанай облысында 40 жыл жөнделмеген тас жолдар қалыпқа келтіріледі деп жоспарланған, деп хабарлайды inbusiness.kz сайты.
Өңірдегі республикалық маңыздағы күре жолдардың жалпы ұзындығы 1534 шақырымды құрайды және оның 82% қанағаттанарлық деңгейде. Кейбір учаскелердің жөнделмегеніне 40 жылдай болғанын халық та, жолшылар да айтып жүр. Осы мақсатта өңірдегі автожолдарды қалыпқа келтіру бойынша ауқымды шаралар кешені басталмақ.
Биыл облыста республикалық маңыздағы 6 автожолдың жалпы жиыны 187 шақырымында орташа жөндеу жұмыстарын жүргізу жоспарланған.
Заманауи технологияларды пайдалану арқылы жол жабыны жаңартылып, барлық пайдаланушыларға сапалы жолмен қауіпсіз қозғалыс қамтамасыз етіледі. Оның ішінде Р-63 "Денисовка-Тарвиченко-Аршалы-Комаровка" және Р-36 "Қостанай-Әулиекөл-Сұрған" автожолдары 2023 жылы жөнделе бастаған.
