Қостанай облысында шомылу маусымының қорытындысы шығарылды, деп жазады inbusiness.kz.
Ресми түрде шомылу маусымы 1 қыркүйек күні жабылды.
Облыстық Төтенше жағдай қызметі департаменті полиция және көліктік бақылау инспекциясымен бірлесіп судағы демалыс орындары бойынша 4 мыңнан аса рейд жүргізген. Нәтижесінде 216 бұзушылық анықталып, 146 адам әкімшілік жауапкершілікке тартылды. Салынған айыппұлдардың жалпы сомасы 1 млн теңгеден асып жығылған.
"Шомылу маусымында жедел-құтқару жасағы 10 адамды құтқарды. Олардың екеуі – кәмелетке толмағандар. Өңірдің су айдындарында барлығы 13 қайғылы оқиға тіркелді. Қаза тапқандардың ішінде балалар болған жоқ. Былтыр 2 бала суға батып кеткен болатын", - деді облыстық ТЖД азаматтық қорғаныс басқармасының бастығы Жанат Асылбеков.
Жазатайым жағдайлардың негізгі себептеріне мас күйінде суға шомылу, қайықта балық аулау кезінде, сондай-ақ өз күшін асырау бағалау себебінен де қаза тапқан. Суға батқан он үш адамның 12-сі ер адам.
Шомылу маусымындағы өлім-жітімнің ең көп саны Бейімбет Майлин ауданында тіркелді – 5 жағдай, ал Қостанай ауданында және облыс орталығында – 3 дерек, Рудныйда – 2 жағдай.
