Қостанай облысының зейнеткері алаяқтардың арбауына түсіп, 21 млн теңге несие алған. Бұл туралы Ішкі істер министрінің орынбасары Игорь Лепеха айтты, деп жазады inbusiness.kz.
"Қостанай облысында зейнеткер телефон арқылы сөйлесу барысында "WhatsApp қоңырауы" арқылы ақша салуды ұсынған шетелдік алаяқтардың алдауына түсіп, 2 банкте және бір микрокредиттік ұйымда жалпы сомасы 21 млн теңгеге онлайн тұтыну кредитін ресімдеп, кейіннен алаяқтарға аударды. Полицияға тек екі аптадан кейін жүгінген. Ол кезде ақша шетелге "дропер" арқылы шығарылған", - деді Игорь Лепеха Мәжілісте өткен Парламенттің тыңдауда.
Ол алаяқтардың жеке басы анықталғанын, оларға процессуалдық баға берілгенін атап өтті.
"Жәбірленушінің ай сайын алатын зейнетақысы – 150 мың теңге, ал кредиттер бойынша төлемі 350 мың теңгені құрайды", - деп атап өтті ІІМ өкілі.
