Бүгінгі күні қостанайлықтардың орташа жалақысы да белгілі болды, деп жазады inbusiness.kz сайты.
Қостанай облысының әкімі Құмар Ақсақалов көшпелі брифингте өңірдің дамуында оң өсім барын айтып берді.
– Биыл 11 айдың қорытындысы бойынша облыстың макроэкономикалық көрсеткіштері бойынша оң динамика байқалады. Атап айтқанда, ауыл шаруашылығы көлемі – 19,4%, құрылыс – 14,1%, жеке инвестициялар – 10,7%, сауда – 9,9%, көлік – 5,3%, тұрғын үйді пайдалануға беру 4,1% өсті. Өңдеу секторының көлемі 3,9%-ға төмендеді. Жалпы өңірлік өнімнің өсуі 1,7% құрады, – деді ол.
Құмар Ақсақаловтың сөзінше, қостанайлықтардың орташа жалақысы – 329 131 теңге. Жалақының 13,3%-ға өскенін байқауға болады.
– Биыл 17 мың жұмыс орны ашылды, оның 11 мың жұмысы тұрақты. Осылайша, жұмыссыздық 4,6%-ға төмендеді. Кедейлік шегінен төмен тұратын және атаулы әлеуметтік көмек алатын отбасылар саны айтарлықтай азайды. Нәтижесінде, атаулы әлеуметтік көмек алатын отбасылар санының төмендеу қарқыны бойынша біз республикада 2-орында тұрмыз, – деді облыс әкімі Құмар Ақсақалов.
