ҚР Төтенше жағдайлар министрлігі Қостанайда газ салдарынан қираған ғимарат туралы ақпарат берді, деп хабарлайды inbusiness.kz сайты.
"11 желтоқсан күні сағат 12:39-да Қостанай қаласының Амангелді кентінде газ-ауа қоспасының жарылысы салдарынан жүк көлігін жөндеуге арналған бір қабатты ғимараттың қирағаны туралы хабар түсті. Куәгерлердің айтуынша, үйінді астында адамдар болуы мүмкін", — деп жазылған ҚР ТЖМ хабарламасында.
Іздестіру-құтқару жұмыстарына Қостанай облысы ТЖД және жергілікті атқарушы орган күш-құралдары жұмылдырылған.
Алғашқы медициналық көмекке 12 адам жүгінді.
"Іздестіру-құтқару жұмысында үйінді астынан екі адам құтқарылды, тағы біреуі өлі күйінде табылды, оның аты-жөні анықталып жатыр. Іздеу жалғасуда. Ақпарат түсуіне қарай тағы толықтырылады", — дейді министрлік.
Еске сала кетейік, бұған дейін Қостанайда тұрғын үй опырылып, бірнеше адам үйінді астында қалғанын жазған болатынбыз.
