Биыл "АгромашХолдинг" АҚ базасында картоп жинайтын комбайндар шығару жұмыстары басталады, деп хабарлайды ҚазАқпарат.
"АгромашХолдинг" АҚ атақты "Гомсельмаш" компаниясының үлгісіндегі екі комбайн түрін шығарады. Олар: ПКК-2-05 "ПАЛЕССЕ РТ25" және КПБ-260-2 "ПАЛЕССЕ РТ260-2". Жабдықтар Беларусь Республикасынан әкелінеді.
"Аталған екі комбайн бір-біріне ұқсас. Айырмашылығы тұтынылатын қуаты мен өнімділігінде ғана. Екеуі де бір мезгілде бірнеше жұмысты атқара алады. Мәселен, РТ25 картоп жинап жүріп, топырақты тегістеп отырады. Бұл комбайн сағатына 1 га аумақтан картоп жинай алады.Ал РТ260-2 комбайнында арнайы тіркеме бар. Ол түйнектердің бүлінбеуіне көмектеседі", - дейді компания қызметкері Гүлнар Нұртазина.
Қазіргі уақытта жабдықтарды тасымалдау мәселесі талқыланып жатыр. Компания өкілдерінің сөзінше, комбайн құны қазақстандық шаруалар үшін қолжетімді болмақ.
