Қостанайда автокөлік жедел жәрдем көлігімен соқтығысты, деп жазады Inbusiness.kz ng.kz порталына сілтеме жасап.
Ресурстың жазуынша, жол-көлік оқиғасы 18 мамыр күні Абай даңғылы мен Н.Назарбаев даңғылының қиылысында болған.
“65 жастағы "ВАЗ" жүргізушісі бағдаршамның қызыл түсіне өтіп бара жатқан жедел жәрдем көлігіне жол бермеген”, - деп хабарлады облыстық полиция департаментінің баспасөз қызметі.
Денсаулық сақтау басқармасы баспасөз қызметінің мәліметінше, жедел жәрдем бригадасы жедел миокард инфарктісі бар 69 жастағы науқасты облыстық ауруханаға апара жатқан.
“Бұл – бірінші жеделділік санатындағы шақырту. Зардап шеккендер жоқ. Басқа жедел жәрдем бригадасы науқасты ауруханаға жеткізді”, - деп хабарлады облыстық денсаулық сақтау басқармасы.
"ВАЗ" жүргізушісіне қатысты ҚР ӘҚБтК-нің 610-бабы бойынша әкімшілік іс жүргізу басталды. Әкімшілік құқық бұзушылық бойынша іс жүргізу шешімін мамандандырылған сот қабылдайды.
