Ведомстоның хабарлауынша, қайғылы оқиғалардың дені ересектердің немқұрайлылығы мен жауапсыздығынан болады.
Жыл басынан бері су айдындарында 123 бала суға батып, 119 бала құтқарылған. Ал жол-көлік оқиғаларында 118 бала қаза тауып, 2 275 бала түрлі дәрежедегі жарақат алған.
Ішкі істер министрлігі азаматтарды өз балаларын қараусыз үйде жалғыз қалдырмауға шақырады.
"Биылғы жылдың 26 тамызында Нұр-Сұлтан қаласында 4 қабаттың терезесіндегі тормен ойнап отырып, 8 жасар қыз және оның кіші сіңлісі құлап, ауыр халде ауруханаға жатқызылды. Жасөспірімдер сіздің қамқорлығыңызға және ата-ана бақылауына өте мұқтаж екенін есте сақтаңыз",– деп ескертеді ведомство өкілдері.
Биыл 312 жасөспірім өз-өзіне қол жұмсап, оның 108-і өліммен аяқталыпты. Бұлардан өзге, тұрғын үй секторындағы өрт кезінде 16 бала қаза болған.
"Кәмелетке толмағандардың түнгі уақытта ойын-сауық мекемелерінде немесе тұрғын үйден тыс жерде заңды өкілдерінсіз жүргені үшін ағымдағы жылы 40 мыңнан астам ата-ана әкімшілік жауапкершілікке тартылды",– деп дерек келтірілген.
