Кездесу барысында "Бірлескен көліктік-логистикалық компания – Еуразиялық теміржол альянсы" АҚ ("БКЛК ЕРА") одан әрі дамыту перспективалары қаралды, деп inbusiness.kz primeminister.kz-ке сілтеме жасап хабарлайды. Аталған интеграциялық жоба Қазақстан, Ресей және Беларусь аумағы арқылы "Қытай – Еуропа" бағыты бойынша тұрақты пойыздар құрамында транзиттік контейнерлік тасымалдау қызметтерін қамтамасыз етуге бағытталған.
"Қазақстан өзінің көліктік-логистикалық әлеуетін арттыруға ерекше көңіл бөледі. Темір жолдарды одан әрі дамыту, аймақтағы сауда мен транзит көлемдерін арттыру – біз үшін өте маңызды және басым міндеттер", — деді А. Мамин.
2020 жылы пандемияға қарамастан, "Қытай – Еуропа" бағыты бойынша Қазақстан аумағы арқылы транзитпен жүктерді контейнерлермен тасымалдау көлемі 517,5 мың ЖФЭ құрады, бұл 2019 жылғы көрсеткіштен 65%-ға артық. Қазақстан мен Ресей арасындағы жүк тасымалдау көлемі 2020 жылы 85,6 млн тоннадан асты.
Биылғы жылдың I тоқсанында екі ел арасындағы контейнерлік тасымалдар 2020 жылдың сәйкес кезеңімен салыстырғанда 57%-ға өсті. Кездесуге ҚР Премьер-Министрінің орынбасары Роман Скляр мен "Қазақстан темір жолы" ҰК" АҚ басқарма төрағасы Нұрлан Сауранбаев қатысты.
