/img/tv1.svg
RU KZ
ҚР Президенті Алматыда И.Жекенова атындағы жұқпалы аурулар ауруханасына барды

ҚР Президенті Алматыда И.Жекенова атындағы жұқпалы аурулар ауруханасына барды

Қасым-Жомарт Тоқаев 500 адамға стационарлық медициналық жәрдем беруге арналған және заманауи құрылғылармен жабдықталған палаталарды аралап көрді.  

25 Қыркүйек 2020 15:26 235

ҚР Президенті Алматыда И.Жекенова атындағы жұқпалы аурулар ауруханасына барды

Қазақстан Президенті Қасым-Жомарт Тоқаевтың Алматыға жасаған жұмыс сапары И.Жекенова атындағы қалалық клиникалық жұқпалы аурулар ауруханасының жаңа филиалына барудан басталды, деп хабарлайды Ақорда.

Мемлекет басшысына қаладағы медициналық-демографиялық ахуал және COVID-19 індетіне қарсы күресу үшін қабылданған шаралар, сондай-ақ, медициналық жедел жәрдем қызметінің жұмысы жөнінде баяндалды. Президент медицина қызметкерлерімен әңгімелесу барысында ұлттық денсаулық сақтау саласын одан әрі дамыту, медициналық мекемелерді қажетті құрылғылармен жабдықтау, төсек-орын мен инфрақұрылымды жаңарту, сондай-ақ, дәрігерлердің еңбекақысын арттыру мәселелеріне тоқталды.

«2023 жылға қарай медицина қызметкерлерінің еңбекақысын бүкіл экономикадағы орташа жалақыдан екі есе жоғары деңгейге жеткізу міндеті қойылады. Алғашқы медициналық санитарлық жәрдем беру ісін дамытуға баса мән беріледі. Өкінішке қарай, біз бұл салаға уақытында назар аудармадық. Эпидемия мұндай іс-қимылдардың қате екенін көрсетті. Қазір жіберген қателіктерге дұрыс көңіл бөліп, оларды түзетуіміз керек. Әрине, медицина әрдайым басты назарымызда болады, – деді Қасым-Жомарт Тоқаев.

Мемлекет басшысы коронавирустың ықтимал жаңа толқынына дайын болудың маңызды екенін атап өтті. Осы ретте азаматтарымыздың өмірі мен денсаулығын сақтау үшін барлық ресурсты жұмылдыру қажеттігін айтты.

«Қазір бүкіл әлемдегі жағдай күрделі. Еуропа мен Америкада коронавирустың екінші толқыны өтіп жатыр. Осындай жағдайда біз қырағылық танытып, дайын болуымыз қажет. Пандемияның бірінші толқынынан жақсы сабақ алдық. Бұл тәжірибенің пайдасы болады. Әрине, қиын болды, қателіктер жіберілді, соның ішінде, Денсаулық сақтау министрлігі тарапынан да ағаттықтар кетті. Бұл қателіктерді жұмыс барысында жөндеуге тура келді. Дегенмен, кез келген тәжірибенің, тіпті ауыр болса да, пайдасы бар. Сондықтан екінші толқынға дайын болайық. Содан кейін бүкіл дүние жүзімен, халықаралық қоғамдастықпен бірге барлық қиындықты лайықты түрде еңсеруге тиіспіз», – деді Президент.

Кездесу саңында Мемлекет басшысы пандемияға қарсы күрестің күрделі жағдайында атқарған қажырлы еңбектері үшін дәрігерлерге ризашылық білдірді.

БҚО жұқпалы аурулар ауруханасының директоры қызметінен кетті

 Қазіргі кезде директордың міндетін уақытша басқа адам атқаруда.

18 Маусым 2020 11:18 174

БҚО жұқпалы аурулар ауруханасының директоры Надия Ахметова қызметінен кетті, деп хабарлайды ҚазАқпарат.

Ол өз еркімен жұмыстан кету жөнінде екі мәрте өтініш түсірген.

Н.Ахметованың сөзіне қарағанда, аталған мекемеде өңірде коронавирустың кеңінен таралуына байланысты бірқатар күрделі мәселе туындаған. Емдеу мекемелерінде оңтайландыру жүруіне байланысты ауруханада төсек-орындардың тең жартысы қысқартылғандықтан, індет басталғаннан-ақ орын жетіспеушілігі байқалған. Бұған медицина қызметкерлерінің тапшылығы қосылған. Олардың бірқатары наурыздан бері үйіне бармай, қызмет атқарса, бірқатары өздері індет жұқтырып, емделуде.

Қазіргі таңда дәрігер болып жұмыс істейтін қызы коронавируспен ауырып қалғандықтан, Н.Ахметованың өзі де үйде оқшаулануда.

Бұдан бұрын жазғанымыздай, өңірде коронавируспен ауырғандардың көптігіне байланысты аталған мекеме науқасқа толып қалып, қалалық көпбейінді ауруханада қосымша орындар ашылуда.

Бұл жөнінде мәлім еткен БҚО денсаулық сақтау басқармасының басшысы Болатбек Қаюпов Надия Ахметованың қызметтен неге кеткендігін айтты.

«Ол бұдан бір ай бұрын қызметтен кету жөнінде арыз жазған болатын. Ол кезде мен сабыр етуін өтініп, өтінішін қанағаттандырмаған едім. Бірнеше күн екінші мәрте өтініш түсірді, бұл жолы қол қойдым. Біздің арамызда талас-тартыс болған жоқ. Бәрі де жұмыс бабында болып, шешіліп жатты. Осындай қиын жағдайда жұмыс істеудің оңай еместігін түсінемін. Қазіргі кезде директордың міндетін уақытша басқа адам атқаруда», – деді Болатбек Қаюпов.

3 қалада қысқа мерзімде жұқпалы аурулар ауруханасы салынады

Нұр-Сұлтан, Алматы және Шымкент қалаларында аурухана құрылысы шұғыл жүргізіледі.

03 Сәуір 2020 15:03 1039

Бүгін ҚР Премьер-Министрі Асқар Маминнің төрағалығымен ҚР Президенті жанындағы Төтенше жағдай режимін қамтамасыз ету жөніндегі мемлекеттік комиссияның селекторлық отырысы өтті, деп хабарлайды үкімет басшысының баспасөз қызметі.

Үкімет басшысы әкімдерге ауруханаішілік жұқпалы аурулардың алдын алу мақсатында инфекциялық, провизорлық және карантиндік нысандардағы санитарлық талаптардың мүлтіксіз сақталуын қамтамасыз етуді тапсырды.

Отырыста Денсаулық сақтау министрлігінің ұсынысы бойынша Нұр-Сұлтан, Алматы және Шымкент қалаларында тез тұрғызылатын құрылымдардан үш жұқпалы аурулар ауруханаларын салу туралы шешім қабылданды.