"Қазақстан темір жолы" ҰК" АҚ басшысы Қанат Алпысбаев 2017 жыл қорытындысын жасап, жаңа жылға тапсырма белгіледі, деп хабарлайды компанияның баспасөз қызметі.
2017 жылы жүк айналымы 208,8 млрд тонна-шақырымды құрады. Бұл 2016 жылмен салыстырғанда 10 пайызға жоғары көрсеткіш.
Жүк тиеу көлемі 242 млн тоннаны құрап, 2016 жылмен салыстырғанда 12% өсті.
Әлеуметтік маңызды жүктерді тасымалдау көлемі толығымен орындалды. 103,2 миллион тонна көмір тиелді. Ол 2016 жылмен салыстырғанда 13 миллион тоннаға артып, 14% жоғары болды. Астық және ұн өнімдерін тиеу көлемі 13,5 миллион тоннаға жеткізілді. Оның ішінде 8,9 миллион тонна астық тасымалданды. Ол 2016 жылғы көрсеткішпен салыстырғанда 104 пайызға жоғары. Ұн өнімдерін тасымалдау -3,2 миллион тонна болса, 2016 жылмен салыстырғанда 112 пайызға жоғары көрсеткішті құрады.
Транзиттік жүктерді тасымалдау көлемі 16 миллион тоннаға жеткізіліп, 2016 жылмен салыстырғанда 23% көтерілді.
Халықаралық ЭКСПО көрмесі кезінде 14 уақытша пойыз қатынаса, оның 7 пойызы тұрақты кестеге көшірілді. Осы кезеңде 5 миллион 647 мың жолаушы тасымалданды. Өткен жылы электрондық билет сату 64% өссе, 2018 жылы оны 75% жеткізу көзделіп отыр.
