Алматы облысы Алакөл ауданындағы Достық – 19 разъезд аралығында екінші жолдың және 19 разъездегі үш қабылдау-жөнелту жолының құрылысы басталды.
Қазіргі уақытта екінші жолды төсеу үшін жерді дайындау жұмыстары жүргізілуде. 110 мың текше метрден астам жер төсемі себілді. Сондай-ақ, 3 су өткізу құбыры ұзартылып, темірбетон теміржол көпірінің құрылысы жүргізілуде, деп хабарлайды ҚТЖ баспасөз қызметі.
Достық станциясында станциялық жолдарды қайта төсеу үшін жер төсемін салу бойынша құрылыс-монтаждау жұмыстары жүргізілуде. №19 разъезде сыртқы электрмен жабдықтау тіректерін монтаждау үшін дайындық жүргізілуде.
Бұл жұмыстарға 80-нен астам адам және 45 бірлік арнайы техника жұмылдырылды.
Жобаны іске асыру пойыздар қозғалысының жылдамдығын арттыруға, Қазақстанның Қытай-Еуропа бағыты бойынша негізгі транзиттік дәлізінің өткізу және тасымалдау қабілетін ұлғайтуға мүмкіндік береді.
