10 қаңтарда Қазақстан арқылы Ресейге қырғыз кәсіпкерлері үшін теміржол жүк транзитінің құны бір вагон үшін 5155 доллардан 1820 долларға дейін төмендетіледі. Бұл туралы "ҚТЖ – жүк тасымалы" президенті Оралхан Құлақов мәлім етті деп хабарлайды LS.
Биыл жалпы алғанда Еуразиялық экономикалық одаққа мүше елдердің жүк тасымалы тарифтері төмендетіліп, біркелкі тарифке көшпекші.
"Луговой – Илецк бағдарында бір вагонның құны 5155 долларды құрайды және 10 қаңтардан бастап ол 1820 долларға, яғни үш есеге дейін төмендейді. Тарифтер ЕАЭО ішінде тасымалданатын барлық жүк түріне төмендетіледі", – деді Оралхан Құлақов.
Оның айтуынша, осының салдарынан ҚТЖ 2017 жылы біршама кірістен қағылмақшы.
"Жыл сайын 4 млн тоннадан астам тасымал жасаймыз, ал оларды ЕАЭО-ның біркелкі тарифіне көшірсек, компания 42 млн теңге кірістен айырылады. Біздің есебіміз бойынша, оны тасымал көлемін арттыру есебінен ғана толтыра аламыз. Яғни, тасымал көлемі 4 млн тоннаның орнына 12 млн тоннаны құрайтын болса, онда бұл Қырғызстан мен Ресей арасында тауар айналымына серпін береді.
