Әлеуметтік желілерде әл-Фараби атындағы ҚазҰУ студенттері мен қызметкерлерінің эвакуацияланғаны туралы ақпарат тарады, деп хабарлайды inbusiness.kz сайты.
Оқиға әл-Фараби атындағы ҚазҰУ-дың Биология және химия факультетінің маңында болған.
Алматы полиция департаментінің мәліметінше, қаладағы оқу орындарының бірінен қараусыз қалған сөмке табылған. Оқиғаға байланысты шұғыл қызметтер дереу шақырылған.
– Қауіпсіздікті қамтамасыз ету мақсатында студенттер мен оқытушылар эвакуацияланды. Тексеру барысында сөмкенің студенттердің біріне тиесілі екені және ішінде оқу құралдары бар екені анықталды. Сөмкедегі заттар қауіп төндірмейтіні белгілі болды, – деп хабарлады полицияның баспасөз қызметі.
Полиция азаматтарды қырағылық танытқаны үшін алғыс айтып, күмәнді немесе қараусыз қалған заттарды байқаса, өз бетінше әрекет етпей, дереу 102 нөміріне хабарлауды ескертті.
