Қызылорда облысында соңғы 6 жылда мұнай өндіру көлемі 4,3 млн тоннаға қысқарды. Болжам бойынша, биылғы жылы тағы 1,1 млн тоннаға қысқармақ. Бұл туралы облыс әкімі Қ.Ысқақов мұнай-газ саласы қызметкерлерінің кәсіби мерекесінде айтты.
Сарапшылардың айтуынша, енді өңірдің мұнай-газ саласының ресурстық әлеуетін арттыруға перспективалы шөгінді бассейндер мен Арал теңізінің акваториясын кең ауқымды зерделеу ықпал етпек.
"ҚР үкіметінің қаулысымен Қызылорда облысының әлеуметтік-экономикалық дамуының кешенді жоспары бекітілді. Кешенді жоспарда Шу-Сарысу, Оңтүстік Торғай, Сырдария шөгінді бассейндерін геологиялық зерттеу қамтылған, онда көмірсутек қорларын анықтау қарастырылған", – деді аймақ басшысы.
Алдағы уақытта облыстың ірі компаниялары мемлекеттік-жекеменшік әріптестік шеңберінде жаңа кен орындарын барлау бойынша бірлесіп жұмыс істемек.
Нұрбек Дәуренбеков
