Дәстүрге айналған форум биыл "Қызылорда: тұрақты өрлеу, инвестициялық ынтымақтастықтық үшін жаңа мүмкіндіктер" деп аталды.
Жиында сөз алған Қызылорда облысы әкімі Қ.Ысқақов аймақтың артықшылықтарын айтты.
"Қызылорда облысының ең маңызды артықшылықтарының бірі – тиімді логистикалық жағдайға ие екендігі. Бүкіл облыс арқылы су артериясы (Сырдария өзені), оның бойымен темір жол және "Батыс Еуропа – Батыс Қытай" халықаралық магистралінің 800 км астам ең үлкен учаскесі біздің өңір арқылы өтеді", – деді облыс әкімі.
Шара барысында құны 100 млрд теңгеге жуық жобаларды іске асыру мақсатында 25 меморандумға және 1 келісім-шартқа қол қойылды.
Түрлі экономикалық басымдыққа ие салаларды қамтыған шарттар қатарында өнеркәсіпте – 14, агроөнеркәсіптік секторында – 9, мемлекеттік–жекешелік әріптестік бағытында 3 инвестициялық жобалар тізімге енді.
Форум аясында пленарлық, секциялық жиындар өтті. Онда "Байқоңыр АЭА – жобаларды іске асыруға арналған перспективалы алаң", "Ауыл шаруашылығында фермерлікті және мал шаруашылығы кластерін дамыту мүмкіндіктері", "Мемлекеттік-жекеменшік әріптестікті дамыту перспективалары" тақырыптарын бойынша баяндамалар оқылды.
Нұрбек Дәуренбеков
