Елбасы ресми сапар аясында АҚШ-тың іскер топ өкілдерімен де кездесті. Мемлекет басшысы екі жақты қатынастардың кең ауқымын қамтитын Кеңейтілген стратегиялық әріптестік туралы бірлескен мәлімдемені қабылдаудың ерекше маңыздылығын атап өтті. Кездесу соңында құны шамамен 7 млрд долларды құрайтын инвестициялық және сауда-экономикалық ынтымақтастық туралы 20-дан астам коммерциялық келісімге қол қойылды. Мәселен, шамамен 1,5 млрд долларға авиация және ғарыштық зерттеу саласындағы техникалар мен қызметтерді сатып алу жөніндегі келісім жасалды. Ал АҚШ-тың Шетелдік жеке инвестициялар корпорациясымен, Опенхаймер және Голдман Сакс компанияларымен бірлескен инвестициялық жобалар мен сауда операцияларын қаржыландыру құжатының сомасы 3 млрд долларды құрайды. Сонымен қатар темір жол секторының жобалары бойынша Дженерал Электрик Корпорейшнмен 1 млрд доллардан астам сомаға келісімшарт рәсімделді. Қазақстан Президенті америкалық бизнесмендерге арналған сөзінде агроөнеркәсіп кешеніндегі бірлескен жобаларды жүзеге асыру үшін шетелдік инвесторларды қатысуға шақырды.
Нұрсұлтан Назарбаев Қазақстан Республикасының Президенті
– Америка Қазақстан экономикасына салынған тікелей инвестициялардың көлемі бойынша екінші орында. Тәуелсіздік жылдары ішінде сіздердің компанияларыңыз тарапынан Қазақстанға 50 миллиард доллардан астам инвестиция құйылды. Өткен жылы екі ел арасындағы тауар айналымы 2 миллиард долларға жетті. Біздің елде энергетика, көлік, инновация, медицина және басқа да салаларда Америка капиталының қатысуымен 500-ден аса компания табысты жұмыс істеп келеді. Біздің ірі серіктестеріміздің қатарында Шеврон, Эксон Мобил, Дженерал Электрик, Хэллибёртон және басқа да компаниялар бар.
