Айтулы оқиғаға орай халықаралық ұйымдар өкілдері мен әлемдік спорттың белді тұлғалары өздерінің жылы лебіздерін жаудырды. "Біріккен күрес әлемінің" (UWW) президенті Ненад Лалович дәл осы спорт түріндегі қазақ халқының жетістіктерін жоғары бағалады, деп жазады Inbusiness.kz.
"Құрметті Президент Құлыбаев мырза! Құрметті қазақстандық әріптестер мен достар! Осы мүмкіндікті пайдалана отырып, "Біріккен күрес әлемінің" (UWW) президенті ретінде баршаңызды және елдеріңіздегі спорт қауымдастығын құттықтаймын", — деп бастады сөзін Ненад Лалович.
Ол Қазақстан Олимпиадалық комитетінің құрылғанына аз уақыт өтсе де, оның қоржынында қазірдің өзінде 79 олимпиадалық медаль барын, оның 17-сін балуандар жеңіп алғанын атап өтті.
"Күрес қазақтың қанында бар. Спортшылардың Олимпиадалық рухын нығайту үшін осы спорт түріне қолдау көрсетіп жатқан Қазақстанның Ұлттық Олимпиадалық комитетіне алғысымды айтқым келеді. Алдағы уақытта тек жеңістер мен жетістіктер тілеймін!" — деп құттықтады UWW Президенті.
