ҚР Қорғаныс министрлігі Алматыдағы Құрлық әскерлері Әскери институтының 210 курсантының оқу орнын рұқсатсыз тастап кету фактісін тексеріп жатыр, деп хабарлайды inbusiness.kz Қорғаныс министрлігінің баспасөз қызметіне сілтеме жасап.
"2021 жылдың 1 желтоқсанында сағат 18:00-ден кейін Құрлық әскерлері Әскери институтының төртінші курсында оқитын 210 курсант оқу орнынан рұқсатсыз шығып кетті. Институт басшысы, генерал-майор Дулат Адырбековтың айтуынша, курсанттар кадрлық тағайындауларға келіспеушілік танытып, бұрынғы басшылықты қайтаруды сұрайды", – деп жазылған хабарламада.
Бұл жағдай туралы курсанттардың ата-аналарына хабаланған.
Ведомстводан айтылғандай, қазір Қорғаныс министрінің орынбасары генерал-лейтенант Сұлтан Камалетдинов жетекшілік ететін комиссия мән-жайды анықтап жатыр. Сонымен қатар министрлік 2 желтоқсан сағат 9:00-ден бастап барлық курсант сабаққа келгенін хабарлады.
