Осы жылдың 9 айында сәулет, қала құрылысы, құрылыс қызметі және тұрғын үй қатынастары саласында 2,9 мың әкімшілік құқық бұзушылық тіркелді. Бұл былтырғыға қарағанда 16,8%-ға артық, деп жазады inbusiness.kz ranking.kz сайтына сілтеме жасап.
Құқық бұзушылықтардың 2,8 мыңы қаралды. Бұл өткен жылдың сәйкес кезеңімен салыстырғанда 25,2%-ға артық. Бұдан бөлек 64 жағдай бойынша іс тоқтатылған көрінеді.
Ал, 46 іс бойынша ескерту беріліп, 2,7 мың құқық бұзушылық жағдайы бойынша әкімшілік айыппұл салынды.
Әкімшілік құқық бұзушылықтың 38,5%-ы нысандар мен кешендерді салу бабы немесе сараптамадан өтпеген жобалау құжаттамасы бойынша тіркелген (1,1 мың құқық бұзушылық).
Одан кейін техникалық және авторлық қадағалаусыз құрылысты жүзеге асыру бабы (636 құқық бұзушылық, +74,2%), ҚР заңнамасының және мемлекеттік нормативтердің талаптарын бұза отырып, жобалау алдындағы, іздестіру, жобалау, құрылыс-монтаждау жұмысын орындау бабы (261 құқық бұзушылық, +3,6%) бойынша тіркелді.
Республика бойынша әкімшілік құқық бұзушылықтардың 19,5%-ы Алматы қаласында тіркелген (564 жағдай, +62,1%). Антилидерлер қатарында ШҚО (429 құқық бұзушылық) және Шымкент қаласы (382 құқық бұзушылық) бар.
Құқық бұзушылықтың ең төмен көрсеткіші Жетісу, Қызылорда, Солтүстік Қазақстан облыстарында байқалды. Абай және Ұлытау облыстарында бірде-бір жағдай тіркелмеген.
