Құны 78 миллион теңгеден асатын пәтер сатып алған азаматтардың банк есепшоттары бақылауға алынбақ, деп жазады inbusiness.kz сайты.
Құжатқа сәйкес, екінші деңгейлі банктер салық органдарына жеке тұлғалардың шоттарының бар-жоғы мен нөмірлері, қаражат қалдығы мен қозғалысы, берілген несиелер туралы мәліметті ұсынуға міндеттеледі.
Сондай-ақ бір жыл ішінде 20 мың АЕК-тен (шамамен 78,6 млн теңге) асатын мүлік сатып алғандар туралы ақпаратты да ұсынып отырады.
Министрлік бұл шара кірістер мен мүлікті декларациялау процесін жетілдіруге, камералдық бақылауды уақтылы жүргізуге, бюджет кірісін арттыруға және көлеңкелі экономиканың үлесін азайтуға ықпал ететінін атап өтті.
Айта кетейік, жаңа салық кодексіне сәйкес, құны 450 миллион теңгеден асатын пәтер, көлік және өзге де қымбат мүлік иелеріне "сән-салтанат салығы" енгізіледі.
