Бұл туралы Қырғыз Республикасының президенті Садыр Жапаров Астанада өткен Түркі мемлекеттері ұйымының мерейтойлық саммитінде айтты, деп хабарлайды inbusiness.kz сайты.
"Жалал-Абат қаласын 2025 жылы түркі әлемінің туристік орталығы ретінде атауды ұсынамын. Жалал-Абат Жібек жолы тармақтарының бірінде орналасқан. Сонымен қатар, ол танымал туристік орын болып есептелінеді", - деді Қырғызстан басшысы.
Сондай-ақ, ол түркі елдерінің мәдени және спорт саласындағы байланысына тоқталды.
"Бесінші дүниежүзілік көшпенділер ойындары 2024 жылы өтеді. Спорт пен мәдениеттегі дәстүрлерді сақтауды жалғастыру үшін этноспорттық іс-шаралар аясында ұлттық ойындар тізіміне қырғыз халқының ұлттық ойыны – көкбөру ойынын қосу маңызды деп санаймын", - деп атап өтті Қырғызстан президенті.
Садыр Жапаров көшпенділер ойындарын өткізуге кезінде Қырғызстан бастама көтергенін де атап өтті.
