"Президент Әкімшілігінің бұрынғы басшысы Медет Садырқұловтың өліміне күдікті Санжар Сапарбеков Бішкек тергеу изоляторына қамалды", – деп хабарлады Қырғызстан ІІМ жексенбі күні.
Тәртіп сақшыларының айтуынша, айыпталушы 26 қарашада ұсталған.
"Күдікті дереу УҰИ-да қамауға алынып, елорданың Первомай аудандық сотының тергеу судьясы Санжар Сапарбековке қатысты қамауға алу түріндегі бұлтартпау шарасын қолданды. Ол тергеу изоляторларында 2022 жылдың 26 қаңтарына дейін ұсталады", – деп нақтылайды ресми ақпар.
Сапарбеков Санжар Әділбекұлы 1980 жылы Бішкекте туып-өскен, кикбоксингтен спорт шебері.
"Тергеу мәліметтері бойынша, ол Максим Бакиевтің досы болған", – делінген хабарламада.
Садырқұлов және халықаралық стратегиялық зерттеулер институтының бұрынғы директоры Сергей Слепченко мен жүргізуші Кубат Сулайманов 2009 жылғы 13 наурызда Бішкек маңында жол апатынан қаза тапты.
"Ош облысының тумасы Өмірбек Осмонов жол апатына кінәлі деп танылды. Сот оны қоныс колониясында 12 жылға бас бостандығынан айырды. 2010 жылғы сәуірдегі оқиғалардан кейін Өмірбек Осмонов өлтірілді. Мәйіт Бішкек маңындағы жаңа ғимараттардың бірінен табылды. Белгісіз біреу оған 11 пышақ жарақатын салған. Бұл қатыгез кісі өлтірулер (үш оқиға) Бакиевтер кланы құлатылғаннан кейін ғана ашылды", – деп жазады басылым.
Тергеу мәліметінше, Садырқұловтың автокөлігі шекара бекетінен өткен, ал Қырғызстанның Мемлекеттік күзет қызметінің бұрынғы және қазіргі қызметкерлерін жол қозғалысы қауіпсіздігі басқармасы мен ІІМ ГУУР қызметкерлері тоқтатқан.
"Жолаушыларды кісі өлімі болған саяжайға Құрманбек Темірбаев (Президент Бакиевтің бұрынғы іс басқарушысы) алып кеткен, содан кейін олар жол-көлік оқиғасы болды деп "қойылым" көрсеткен", – делінген хабарламада.
"Тапсырыс беруші ретінде Құрманбек Бакиевтің ағасы Жаныш Бакиев деп аталды", – деп қосады басылым.
Естеріңізге сала кетейік, Құрманбек Бакиев билікке 2005 жылы Президент Асқар Ақаевтың үкіметіне қарсы "Қызғалдақ төңкерісі" нәтижесінде келді. Бірақ оның өзі 2010 жылы құлатылып, өзінен бұрынғы басшы сияқты елден қашып кетті. Қазір Бакиев Беларуссияда саяси эмиграцияда тұрады. Ол Қырғызстанда екі қылмыстық іс бойынша сырттай 49 жылға бас бостандығынан айрылды, тағы бір қылмыстық іс бойынша іздеуде.
